Қан қысымын дәрісіз қалай тез түсіруге болады

Суррей университетінің ғалымдары тұрақты түрде шай, қара шоколад, алма және жүзім тұтыну артериялық қысымды төмендетуге ықпал ететінін анықтады, деп хабарлайды El.kz ақпарат агенттігі.

Зерттеу нәтижелері European Journal of Preventive Cardiology журналында жарияланды.

Ғалымдар бұл әсерді какао, шай, жеміс-жидек құрамындағы табиғи қосылыстар — флаван-3-олдармен байланыстырады. 145 рандомизацияланған зерттеудің талдауы флаван-3-олдардың әсіресе жоғары қан қысымы бар адамдарда қысымды төмендететінін көрсетті. Кейбір жағдайларда бұл әсер дәрі-дәрмек қабылдау нәтижесімен салыстырарлық болды.

Сонымен қатар, зерттеу нәтижесінде қан тамырларының ішкі қабаты — эндотелийдің қызметі жақсарғаны байқалды. Эндотелий жүрек-қан тамырлары жүйесінің денсаулығында маңызды рөл атқарады. Бұл оң өзгерістер қан қысымының деңгейіне қарамастан тіркелген, яғни флаван-3-олдардың ағзаға жан-жақты пайдасы бар екенін көрсетеді.

Ғалымдар флаван-3-олдарды негізгі емдеу әдісінің орнына қолдануға болмайтынын атап өтті. Дегенмен, оларды теңгерімді тамақтану аясында орташа мөлшерде тұтыну жүрек-қан тамырлары денсаулығын қолдаудың қосымша амалы бола алады.