Қала мэрі қолтырауынға үйленді

Мексиканың Сан-Педро-Уамелула қаласының мэрі Даниэль Гутьеррес кайманның ұрғашысымен, яғни кішкентай қолтырауынмен неке қиды. Бұл туралы Reuters агенттігі хабарлады, деп жазады El.kz интернет порталы.

Тұрғындар «кішкентай ханшайым» деп атайтын рептилияға дәстүрлі ақ көйлек кигізілген. Үйлену рәсімі алдында оны көше бойымен алып жүріп, әртүрлі үйлерге кіргізген. Халық бұл кезде ән айтып, би билеп, мерекелік көңіл күйге бөленген. Салттың шарықтау шегі – күйеу жігіттің рептилияны сүюі болды.

Мерекелік шаралар үш күнге созылған. Жергілікті тұрғындардың айтуынша, бұл – жер-анадан және жаратушыдан молшылық пен береке сұрауға арналған дәстүр.

Біз үшін бұл – Жер-анамен және Жаратушымызбен байланыс орнатудың жолы, – деді салтанатқа қатысушылардың бірі.

Жергілікті сенім бойынша, кайман Жер-ананың бейнесі саналады. Оның «ру көсемімен» некелесуі – адамдар әлемі мен құдайлар әлемінің бірлігін білдіретін қасиетті символ.

Бұл ерекше дәстүрдің тарихы кемінде XVIII ғасырға дейін барады. Алайда зерттеушілер оның тамыры бұдан да тереңде, Еуропалықтар Орталық Америкаға келмей тұрған дәуірде пайда болған деп болжайды.