Президент «Торғай – Ырғыз» автожолының құрылысын жеделдетуді тапсырды

Мемлекет басшысы Үкіметке «Торғай – Ырғыз» және батыс бағыттағы өзге де автокөлік жолдарының құрылысын жеделдетуді тапсырды. Бұл туралы Президенттің көмекшісі әрі баспасөз хатшысы Руслан Желдібай Telegram арнасында жазды, деп хабарлайды El.kz интернет порталы.

Президент Үкіметке «Торғай - Ырғыз» және батыс бағытындағы басқа да автокөлік жолдарының құрылысын жеделдетуді тапсырды, - деп жазды Руслан Желдібай.

Қостанай облысында бүгінде стратегиялық маңызы бар «Орталық – Батыс» автожолы салынып жатыр. Құрылыс жұмыстары маусым айында бірден екі жерде басталған: бірі – Арқалық қаласында, екіншісі – Жанкелді ауданының Торғай ауылында. Жалпы жоба ұзындығы 865 шақырымды құрайды. Ол «Астана – Жантеке – Егіндікөл – Арқалық – Торғай – Ырғыз» бағытын қамтиды. Жаңа дәліз елдің орталығы мен батысын тікелей байланыстырып қана қоймай, Транскаспий халықаралық көлік бағытына да жол ашады.

Жобаның жүзеге асуының нәтижесінде Астана мен Ырғыз арасындағы қашықтық 573 шақырымға қысқарады. Бұл ел ішіндегі жүк тасымалы мен жолаушылар қатынасына зор серпін бермек.