«Пневматикалық қарудан оқ отқан»: жануарларға зәбір көрсеткендер жазаланады

Талдықорған маңында белгісіз бір адам пневматикалық қарудан оқ атып, иитті екі жерден жаралайды. Артынша ізін суытып, тастап кетеді. Джек есімді төбет бірнеше күн қараусыз қалады. Кейіннен оны ауыл тұрғыны тауып алып, волонтерлерге табыстайды. Оқиға 2 ай бұрын болса да, құқық қорғау орындары қозғала қоймаған.

Екі жерінен оқ атқан

«Мысық пен ит» қоғамдық қоры әлеуметтік желіде дабыл қағып жатыр. Өйткені Джекті мал дәрігеріне апарғанымен, жұлындағы екі оқты алмайды. Өйткені өміріне қауіп төнуі мүмкін. Қазір ем-дом жүргізіп жатыр. Бірақ осы уақытқа дейінгі ем волонтерлердің қалтасына салмақ түсіреді. Олар елден көмек сұрап отыр. 

Бұл оқиға 14 ақпан күні Еркін ауылында болған. Итті атқан адам жайлы хабар жоқ.

Жануарға зәбір көрсетуге жол жоқ

Мәжіліс депутаты Еділ Жаңбыршин жануарларға жәбір көрсеткендердің жауапкершілігін күшейту жөніндегі заң жобасы аясында бірқатар маңызды өзгерістер ұсынылғанын атап өтті. Бұдан бұрын Қасым-Жомарт Тоқаев қойған тапсырмаларға сәйкес әзірленген. Мемлекет басшысы жануарларға қатыгездік үшін жазаны күшейтуді және олардың иелерінің жауапкершілігін арттыруды талап еткен еді.

Депутаттың сөзінше, жануарға зәбір көрсету қоғамда  резонанс тудырған. Осыған байланысты Қылмыстық кодекс пен Әкімшілік құқық бұзушылық туралы кодекске өзгерістер енгізу ұсынылған.

Атап айтқанда:

• жануарларды күтіп ұстау және оларға қарау бойынша иелердің жауапкершілігі күшейтіледі;
•  тиісті баптар бойынша айыппұл көлемі бірнеше есе арттырылады;
• жануарларға зақым келтіргені үшін қамау мерзімі 2 айдан 6 айға дейін ұлғайтылмақ;
•  жануарларды қатыгездікпен өлтірген жағдайда жаза 2 жылдан 5 жылға дейін бас бостандығынан айыруға дейін күшейтіледі;
•  сондай-ақ мүлікті тәркілеу мүмкіндігі қарастырылған.

Жаңбыршиннің айтуынша, Үкімет бұл ұсыныстарға оң бағасын берген, алда екінші  оқылымда пысықталады.

Біз Президент тапсырмасын орындауға міндеттіміз. Бұл – тек құқықтық мәселе емес, болашақ ұрпаққа үлгі болатын маңызды қадам. Жануарларға қатыгездік танытқандар заң аясында қатаң жауапкершілікке тартылады, – деді депутат.