Петропавлда Сабантой мерекесі атап өтілді

Биыл Солтүстік Қазақстан облысының татарлары Сабантой мерекесін ерекше атап өтті. Себебі, СҚО «Дуслык» татар-башқұрт орталығына биыл 30 жыл толуда. 

Қала алаңында жаңбырлы ауа райына қарамастан, көңіл көтеріп, би билеп, ән шырқаған жүздеген адам жиналды. 

Солтүстік Қазақстан облысы әкімінің орынбасары Руслан Әлішев, сондай-ақ облыстық Қазақстан халқы Ассамблеясы хатшылығының меңгерушісі Мұратбек Зейнуллин барлық қатысушыларды мерекемен құттықтап, орталық басқармасының мүшелері, ақсақалдар мен құрметті қонақтар ізгі тілектерін арнады. 

Концерттік бағдарламаға қатысу үшін Татарстан Республикасы мен Көкшетау қаласының әртістері арнайы келді. Жергілікті орындаушылар да жиналған қауымды жаңа репертуармен қуантты. 

Мұнда ұлттық ойындар, спорттық жарыстар алаңдары, сондай-ақ қала тұрғындары татар ұлттық мәдениетіне жақындай алатын сәндік-қолданбалы өнер бұйымдарының көрмесі ұйымдастырылды.