Павлодарда пәтер өртеніп, зейнеткер көз жұмды

Павлодарда пәтерден өрт шығып, 65 жастағы зейнеткер қайтыс болды, деп хабарлайды El.kz ақпарат агенттігі.

Облыстық ТЖД мәліметінше, бүгін таңғы сағат 04:49-да Рылеев көшесіндегі көпқабатты тұрғын үйлердің бірінде өрт шыққаны туралы хабарлама түскен.

Оқиға орнына шұғыл жеткен өрт сөндірушілер үш бөлмелі пәтердің өртеніп жатқанын анықтаған. Өрттің аумағы – 4 шаршы метр, үйдегі заттар, жиһаз бен еден жанған. Тұрғын үйден 17 адам мен 3 бала сыртқа өз күшімен шықты. Мамандардың көмегімен 3 тұрғын шығарылды.

Өртті сөндіру кезінде 1959 жылы туған ер адамның денесі табылды.

Оқиға орнында ТЖД-ның 16 қызметкері мен 4 техника жұмыс істеді. Өрттің шығу себебі анықталып жатыр.