Павлодар жылу энергетикалық орталығында өрт шықты

Павлодар 3-ЖЭО-да трансформатор өртенді. Оқиға орнында өңірдің ТЖД, апаттар медицинасы орталығы және "Семсер-өрт сөндіруші" ЖШС қызметкерлері жұмыс істеді, деп хабарлайды El.kz Pavlodarnews.kz сайтына сілтеме жасап.

Павлодар 3-ЖЭО аумағындағы түтінді қала тұрғындары байқаған. Солтүстік өнеркәсіптік аймақта трансформатор жанғаны белгілі болды.

– 21 шілде күні сағат 18:25-те "Павлодарэнерго" АҚ ЖЭО-3 аумағында жеке тұрған трансформатор жанып жатқаны туралы хабарлама түскен, - деп хабарлады энергетика және ТКШ басқармасында.

Өртті сөндіруге барлығы 33 адам мен он техника жұмылдырылды. Сондай-ақ, өңірдің энергетика және ТКШ басқармасының басшысы Ержан Салханов орын алған жағдай қаладағы су мен жылу беруге әсер етпейтінін хабарлады.

ТЖД баспасөз қызметі трансформаторлық майдың трансформатордан төгілмей жанғанын хабарлады.

– Трансформатор №3 турбина цехының ғимаратына жақын орналасқан. Қазіргі уақытта ашық жану жоқ. Сондай-ақ, кернеуде тұрған цехтың ішінде кернеу кабельдері жанды. Электр энергиясын өшіру кезең-кезеңмен жүргізіледі, - деді ведомствода.