Қостанайдың тәжік-өзбек қауымдастығы Балалар үйіне жарты тоннадан астам жеміс-жидек тарту етті

Қостанай облыстық «Шарк» тәжік-өзбек этномәдени бірлестігі отбасылық үлгідегі «Жанұя» балалар ауылының тәрбиеленушілеріне жалпы салмағы жарты тоннадан асатын қарбыз, қауын, жүзім және тағы басқа жеміс-жидек өнімдерін тарту етті.

Қауымдастық балалар ауылына осыдан 15 жыл бұрын қамқорлық таныта бастаған, бұл іс әлі күнге дейін жалғасын табуда.  Осы уақыт ішінде мыңдаған бала қауымдастық төрағасы Эргашвой Холметов және оның серіктестерімен әкелінген жеміс-жидек, көкөністер мен шырындардың нәрін бойларына сіңіруде.

Биыл этномәдени бірлестік 15 жылдығын атап өтпек.

Қонақтар жеміс-жидектермен, кәмпиттермен қоса ұн да әкелді. Балалар ауылында бұл тағам түріне сұраныс мол, себебі, тәрбиеленушілер жейтін нан, тоқаш өнімдері балалар үйінде молынан пісіріледі. Достық Үйінің ұжымы ұйымдастырған көңілді байқаулар сәбилердің көңілінен шықты. Кездесу үйдегідей жайбарақат жағдайда өтті.

«Мен бұл жерге қуана келемін. Балалар  – біздің бақытымыз, болашағымыз, ата-ана қамқорлығынсыз қалған балаларға, әсіресе бүлдіршіндерге қуаныш сыйлау – біздің азаматтық парызымыз», - дейді Эргашвой Эрматович.