Олжас Бектенов Грузия премьер-министрі Иракли Кобахидземен кездесті

Үкімет үйінде Қазақстан мен Грузия премьер-министрлерінің кездесуі өтті, деп хабарлайды El.kz ақпарат агенттігі.

Қазақстан премьер-министрі Астанада Грузия елінің үкімет басшысы мен оның делегациясын қарсы алып, әріптесін қызметке қайта тағайындалуымен құттықтап, оның жаңа мәртебедегі Қазақстанға алғашқы сапарының маңыздылығын атап өтті.

Сіздің премьер-министр ретінде Қазақстанға жасаған алғашқы сапарыңыз екіжақты ынтымақтастық үшін маңызды кездесу деп айтуға болады. Біздің елдерімізде ортақ мүдделер көп, әрі сіздің екі ел арасындағы әріптестікті нығайтуға қосқан үлесіңіз біз үшін өте құнды, – деді Үкімет басшысы.

Сондай-ақ, Олжас Бектенов Қазақстан мен Грузия 30 жылдан астам уақыт бойы сенімді саяси және экономикалық серіктестер екенін атап өтті.