Новак Джокович Олимпиададағы жеңісі үшін қанша сыйақы алады

Әлемнің екінші ракеткасы сербиялық Новак Джокович Париждегі Олимпиада ойындарындағы жеңісі үшін қанша сыйақы алатыны белгілі болды, деп хабарлайды El.kz ақпарат агенттігі.

Dailymail мәліметінше, Сербия чемпион атанған спортшыларының барлығына 218 мың доллардан (102 миллион теңге) төлейді. Бұл төртжылдықтың бас додасына қатысып жатқан елдердің арасында қомақты сыйақы қатарына жатады.

Одан бөлек бұл Еуропадағы ең көп сома саналады. Дегенмен Гонконг жеңімпаздарға төлейтін 768 мың доллардан әлдеқайда аз.

Олимпиада чемпионы ретінде Джокович 40 жасынан бастап, яғни үш жылдан соң мемлекеттік зейнетақы алып отырады.

Естеріңізге сала кетейік, Новак Джокович ерлер арасындағы жекелей сында Олимпиада чемпионы атанды. Ол финалда испаниялық Карлос Алькарастан басым түсті.