Қытайда Таяу Шығыстағы шиеленістің күшеюі салдарынан авиациялық отын қымбаттады. Соның әсерінен Оңтүстік-Шығыс Азияға рейстер қысқарып, мамыр мерекелері алдында миллиондаған адамның жоспары бұзылды.

Air China, China Eastern, Spring Airlines, China Southern және лоукостер AirAsia сияқты жетекші қытайлық және аймақтық тасымалдаушылар бірқатар танымал бағыттарға қызмет көрсетуді тоқтатты. Бангкок, Пхукет, Куала-Лумпур және Вьентьян сияқты танымал туристік бағыттарға ұшу тоқтады. 

Hangban Guanjia платформасының есебіне сәйкес, Сиань, Чунцин және Яньтайдан Пхукет пен Бангкокқа ұшатын рейстер сәуір айының басынан бері толық тоқтатылған. Шектеулер ресми түрде кем дегенде мамыр айына дейін ұзартылды.

Дағдарыс ұзақ қашықтыққа қатынайтын бағыттарға, әсіресе Ухань мен Гуанчжоудан Океанияға ұшатын рейстерге де әсер етті. Сәуір айында бұл бағыттарға ұшатын рейстердің тоқтатылу деңгейі 50%-дан асты, болжам бойынша, көрсеткіш келесі айда тағы өседі. 

Үзілістердің негізгі себебі Вашингтонның Иран порттарын блокадаға алу туралы жариялауынан кейін мұнай бағасының күрт өсуі болды. Халықаралық келіссөздің сәтсіз аяқталуы аясында мұнай бағасы барреліне 104 доллардан асты.

Авиакеросин бағасын анықтайтын мазуттың құны 10%-ға өсті, бұл әуе компанияларының шығындарын күрт арттырды. Отын пайдалану шығынның 40%-ын құрайтындықтан, тасымалдаушылар ұшу кестесін қысқартуға және тарифтерді көтеруге мәжбүр. 

Халықаралық әуе көлігі қауымдастығы Ормуз бұғазындағы жағдай тұрақтанғанның өзінде жеткізілімдердің қалыпты жағдайға оралуы үшін бірнеше ай қажет болатынын ескертті. Осы арада Qantas және AirAsia сияқты компаниялар отынға қосымша ақыны көтеріп, ұшу жиілігін 10-20%-ға қысқартты.

Әуе рейстерінің тоқтайтыны туралы ақпаратты қайдан білеміз?

Әуе рейстерінің тоқтатылуы немесе өзгеруі тек бір елге ғана тән жағдай емес. Мұндай өзгерістер әлемнің кез келген бағытында болуы мүмкін. Сондықтан жолаушылар сапар алдында бірнеше дереккөзді тексеріп отырғаны маңызды.

Ең алдымен, әуе компаниялардың ресми сайттары мен қосымшаларына назар аудару қажет. Онда рейстің мәртебесі, кешігуі немесе толық тоқтатылғаны туралы жедел ақпарат жарияланады.

Сондай-ақ, Hangban Guanjia секілді рейстерді бақылау платформалары ұшақтардың нақты уақыттағы қозғалысын көрсетеді. Бұл сервистер арқылы белгілі бір бағыттың орындалып жатқанын немесе тоқтатылғанын оңай анықтауға болады.

Бұдан бөлек, билет іздеу жүйелері мен агрегаторлар да маңызды көрсеткіш береді. Егер белгілі бір бағытта рейстер саны күрт азайса немесе мүлде шықпай қалса, бұл – ұшулардың шектелгенінің белгісі.

Сарапшылар сапарды жоспарламас бұрын рейс кестесін бірнеше рет тексеріп, әсіресе халықаралық жағдай тұрақсыз кезеңде өзгерістерге дайын болуға кеңес береді.