Нұр-Сұлтанда «Арқар» көпіріне жөндеу жұмыстары жүргізіледі

«Арқар» көпірінде жол төсемін орташа жөндеу жұмысы 15 тамызда басталады. Осыған байланысты көліктерге арналған жол жабық болады,– деп хабарлайды El.kz порталы елорда әкімдігінің ресми сайтына сілтеме жасап.

Нұр-Сұлтан қаласының Көлік және жол-көлік инфрақұрылымын дамыту басқармасы 15 тамыз бен 5 қыркүйек аралығында Мәңгілік Ел даңғылы – Сарайшық көшесі мен Р.Қошқарбаев даңғылының қиылысындағы көлік айрығы учаскесіндегі «Арқар» (М1) көпірінің жол төсемін орташа жөндеу жұмысы басталғанын хабарлады.

«Осыған байланысты, 15-24 тамыз аралығында Мәңгілік Ел даңғылы мен Сарайшық көшесінің қиылысындағы көлік айрығынан Р. Қошқарбаев даңғылына дейінгі «Арқар» көпірін (М1) және 24 тамыз бен 5 қыркүйек аралығында «Арқар» көпірін (М1) жабу жоспарланып отыр», – делінген хабарламада.

Ведомствода елорда тұрғындары мен қонақтарынан кептеліс тудырмас үшін қозғалыс бағытын алдын ала жоспарлауды сұрайды.

«Келтірілген қолайсыздықтар үшін кешірім өтінеміз және жөндеу жұмыстарының жүргізілуіне түсіністікпен қарауды сұраймыз», - деп толықтырды басқармада.