Мұғалімдерді ақылы семинар мен газет-журналдарға жазылуға мәжбүрлеу дұрыс па

Үкімет отырысының брифингінде оқу-ағарту министрі Ғани Бейсембаевқа журналистер кейбір өңірлерде мұғалімдердің ақылы семинарларға қатысуға және газет-журналдарға мәжбүрлі түрде жазылуға қатысты шағымдар барын жеткізді. Олар мұндай әрекеттердің қаншалықты заңды екенін сұрады, деп хабарлайды El.kz ақпарат агенттігі.

Министрдің айтуынша, елімізде 8 мыңға жуық мектеп пен 600 мыңға жуық мұғалім бар. Алайда мұндай келеңсіз жайттар нақты қай өңірде, қай мектепте болып жатқанын анықтап, заң бұзылған жағдайда тиісті шаралар қолданылатынын мәлімдеді.

Расында, ақылы семинарлар өткізуге қажеттілік жоқ. Өйткені «Өрлеу» ұлттық біліктілікті арттыру орталығы жүйелі түрде тегін курстар өткізіп отырады. Сондай-ақ, әр өңірде өздерінің әдістемелік орталықтары бар. Қосымша семинарлар да тегін өтуі тиіс. Егер мұғалімдерді мәжбүрлеп ақылы шараларға қатыстыру фактілері болса, бұл – жергілікті білім бөлімдерінің бастамасымен жүзеге асып жатқан жағдайлар. Кейде бұл 5-6 мектеп көлемінде орын алып, бүкіл ел бойынша таралғандай әсер береді. Бірақ нақты фактілер болса, біз заңға сай әрекет етеміз, – деді оқу-ағарту министрі Ғани Бейсембаев.