Қазақстанның халық әртісі Меруерт Өтекешова соңғы уақытта қызу талқыланып жатқан камзол дауына қатысты өз пікірін білдірді. Актриса Баян Алагөзова қолындағы камзолдың түпнұсқа екенін растады.

Өнер иесінің айтуынша, кеңес дәуірінде фильмдерде пайдаланылған костюмдер мен түрлі реквизиттер уақыт өте келе әртүрлі адамдардың қолына өтіп кеткен. Сондықтан мұндай жәдігерлердің жеке адамдарда сақталуы қалыпты жағдай екенін жеткізді.

Шынымды айтсам, мен де оны берген жоқпын. Ол да менің қолымда болған жоқ. Кім сақтаса да, шықты. Енді халық көреді оны, – деді актриса.

Сонымен қатар, Меруерт Өтекешова камзолдың нақты қай жерде сақталуы керектігі жөнінде пікір айтудан бас тартты. Оның сөзінше, көпшілік назары жеке дауға емес, өзінің шығармашылығына аударылғаны дұрыс.

Актриса музейде сақталған камзолдың бір нұсқасы бар екенін де атап өтті. Алайда ол нұсқа көпшіліктің көңілінен шықпаған көрінеді. Сөз соңында өнер иесі костюмнің біреудің қолында сақталып қалғанына қуанатынын жеткізді.