Мемлекет басшысы Ұлттық ұлан сарбазын ұрып-соққандарды жазалауды тапсырды

Мемлекет басшысы Ұлттық ұлан сарбазын пойыз тамбурында ұрғандарды тез арада тауып, жауапқа тартуды тапсырды. Бұл туралы президенттің баспасөз хатшысы Берік Уәли жазды, деп хабарлайды El.kz ақпарат агенттігі.

Президент белгісіз адамдардың Ұлттық ұлан сарбазын пойыз тамбурында ұрғаны таспаланған бейнематериалмен танысып шықты. Мемлекет басшысы ішкі істер министрі Ержан Сәденовке қаскөйлерді ұстап, заңнамаға сәйкес жауапқа тарту үшін шұғыл шаралар қабылдауды тапсырды. Әскердегі және басқа да күштік ұйымдардағы зорлық-зомбылықтың барлық фактісі президентке баяндалады. Мұндай жағдайлар бақылауға алынады, - деп жазды Уәли.

Естеріңізде болса, Қасым-Жомарт Тоқаев биылғы 2 қыркүйектегі жолдауында жас сарбаздардың денсаулығы мен абырой-беделіне қол сұғуға жол бермеу қажет екеніне назар аударған еді. Сонымен қатар бұл мәселеге әскери құрылымдардың басшылары тікелей жауапты екенін айтқан болатын.

Айта кетейік, әлеуметтік желіде белгісіз ер адамның әскери киімдегі жігітті соққылап жатқан сәтінен видео таралды.