Мемлекет басшысы Meta компаниясының вице-президентімен пікір алмасты

Қасым-Жомарт Тоқаев пен Meta компаниясының вице-президенті, жасанды интеллектіні зерттеу бөлімінің (FAIR) бас ғылыми жетекшісі Янн Лекунді қабылдады. Тараптар инновациялық технологияларды дамыту және қолдану жөнінде пікір алмасты, деп хабарлайды El.kz интернет порталы.

Мемлекет басшысы нейрожелілер саласындағы Янн Лекунның жаңашыл жетістіктерін жоғары бағалап, оның жасанды интеллектіні дамытуға қосқан үлесін атап өтті. 

Президент Қазақстанның жаппай цифрландыруды және жасанды интеллектіні дамудың басты факторы ретінде кеңінен қолдануды қарастырып, дербес ЖИ экожүйесі мен Қазақ тілінің үлкен тілдік моделін (KazLLM) жасақтауға күш салып жатқанын жеткізді. 

Қасым-Жомарт Тоқаев Meta Platforms Inc компаниясымен Қазақстанда ЖИ технологияларын дамыту бойынша бірлескен акселерациялық бағдарламаны іске қосу жөніндегі келісімге қол қойылуын құптап, технология алыбымен өзара тиімді серіктестікті одан әрі нығайтуға дайын екенін растады.

Бұған дейін ел Президенті Amazon компаниясының аға вице-президентін қабылдағаны туралы жаздық. Бұл кездесуден кейін Amazon Kuiper спутниктік интернеті Қазақстанда іске қосылатыны белгілі болды.