Қазақстан мектептерінде оқушылардың жазбаша жұмыстары қайта жанданады.

Енді оқушылар мазмұндама, шығарма және диктант жазатын болады. Бұл туралы оқу-ағарту министрі Жұлдыз Сүлейменова мәлімдеді.

Министрдің айтуынша, қазіргі таңда мектеп бағдарламасы жаңартылып жатыр. Жаңа өзгерістер аясында бірқатар пән енгізіліп, кей бағыттар күшейтіледі.

Атап айтқанда, 5-7 сыныптарда «Конституция негіздері», 8-9 сыныптарда «Заң және тәртіп» пәндері оқытылады. Ал 10-11 сыныптарда «Құқық негіздері» міндетті пән ретінде енгізілмек.

Сонымен қатар 8-9 сыныптарда «Қазақстан географиясы» аптасына екі сағаттан оқытылатын болады.

Министрлік мәліметінше, жазбаша жұмыстарды қайта енгізу оқушылардың білім деңгейін жан-жақты бағалауға бағытталған:

Оқушылардың білім деңгейін кешенді бағалау және функционалдық сауаттылығын арттыру мақсатында мазмұндама, шығарма және диктант қайта енгізіледі. Бұл өзгерістер тілдік дағдыларды дамытуға және ойлау қабілетін жетілдіруге бағытталған, – делінген ресми ақпаратта.

Жалпы, енгізіліп жатқан жаңашылдықтар мектеп оқушыларының тек теориялық білімін ғана емес, практикалық және ойлау дағдыларын дамытуға бағытталып отыр.