Басты
Жаңалықтар
Білім

Мектептерде инфекциялық аурулар екі есе артқан

26.05.2026 13:45
Диана Орынбасар
Фото: жасанды интеллект

Қазақстанда соңғы үш жылда мектептердегі топтық инфекциялық аурулар саны екі есеге жуық артқан. Бұл туралы Үкімет отырысында Денсаулық сақтау министрі Ақмарал Әлназарова мәлімдеді. 

Министрдің айтуынша, Денсаулық сақтау министрлігінің негізгі міндеттерінің бірі – білім беру ұйымдары мен балалардың жазғы демалыс орындарындағы санитариялық-эпидемиологиялық қауіпсіздікті бақылау. Бұл жұмыстар инфекциялық аурулардың алдын алып, балалар үшін қауіпсіз орта қалыптастыруға бағытталған.

347 тексеру жүргізілген

Ведомство мәліметінше, жаңа оқу жылы басталғалы бері мектептерде 347 тексеру жүргізілген. Оның 150-і жоспарлы болса, 197-сі жоспардан тыс ұйымдастырылған. Сонымен қатар 49 мектептің ас блогы тексеруден өткен. Тексеру барысында бірқатар жүйелі заңбұзушылықтар анықталған.

Мектептердің санитариялық-техникалық жағдайының талапқа сай болмауы және санитариялық-эпидемиологиялық қорытындылардың жоқтығы сияқты жүйелі бұзушылықтар анықталды, – деді Ақмарал Әлназарова.

Инфекциялық аурулар көбейген

Денсаулық сақтау министрлігінің мәліметінше, соңғы жылдары білім беру ұйымдарында тіркелетін топтық инфекциялық аурулар саны артып келеді. Атап айтқанда, 2023 жылы – 4 жағдай, 2024 жылы – 5 жағдай тіркелсе, 2025 жылы бұл көрсеткіш 8-ге жеткен. Биыл инфекциялық аурулар Ақмола, Жамбыл, Қарағанды, Қостанай, Қызылорда, Маңғыстау және Түркістан облыстарында тіркелген.

Министр бұрын бақылау-қадағалау қызметін либерализациялау бойынша қабылданған шешімдер елдегі эпидемиологиялық жағдайға әсер еткенін айтты.

1 шілдеден бастап жоспарлы тексерулер басталады

Осыған байланысты Мемлекет басшысы биыл мемлекеттік бюджеттен қаржыландырылатын балалар нысандарын ерекше мемлекеттік бақылауға алуды көздейтін заңға қол қойған. Жаңа тәртіпке сәйкес, 1 маусымнан бастап мектептерге мониторинг жүргізіледі. Ал 1 шілдеден бастап барлық балалар нысандарында жоспарлы тексерулер басталады.

Жазғы лагерьлер де бақылауда болады

Үкімет отырысында балалардың жазғы демалысын ұйымдастыру мәселесі де қаралды. Оқу-ағарту министрі Жұлдыз Сүлейменованың айтуынша, биыл жазғы маусымда елімізде 11 135 демалыс орталығы жұмыс істейді. Олар 3,2 млн баланы демалыс және сауықтыру бағдарламаларымен қамтиды. Министрдің мәліметінше, 3 млн-ға жуық бала мектеп жанындағы демалыс орталықтарына барады. Сонымен қатар 168 мың оқушы маусымдық лагерьлерде, ал 44 мыңнан астам бала жыл бойы жұмыс істейтін орталықтарда демалады.

Әлеуметтік осал санаттағы балаларға да ерекше назар аударылған. Атап айтқанда, аз қамтылған отбасылардан шыққан 729 мың бала және ерекше білім беру қажеттіліктері бар 53 мың бала жазғы демалыспен қамтылады. Сондай-ақ республикалық «Балдәурен» және «Бөбек» орталықтарында халықаралық, республикалық олимпиадалар мен шығармашылық, спорттық жарыстардың жеңімпазы атанған 5 мың бала сауықтыру бағдарламасына қатысады. Өңірлерде мұндай қолдау 370 мың дарынды балаға көрсетіледі. Министр жазғы демалыс орындарындағы қауіпсіздік мәселесіне де тоқталды.

Қауіпсіздікті қамтамасыз ету үшін барлық нысандарға полиция инспекторлары бекітілді, ал қызметкерлердің соттылығы тексерілді, – деді Жұлдыз Сүлейменова.

Сонымен қатар Мемлекет басшысының тапсырмасы аясында соңғы үш жылда 24 мың орынға арналған 44 қосымша білім беру ұйымы салынған. Жыл соңына дейін тағы 3 800 орындық 10 нысанның құрылысы аяқталады. Бұдан бөлек, осы кезеңде 2 800 орынға арналған 15 балалар сауықтыру орталығы ашылған. Биыл тағы 840 орындық 4 жаңа сауықтыру орталығы пайдалануға беріледі.

 

 
 
мектеп асханалары тазалық Үкімет отырысы
Қысқа да нұсқа. Жазылыңыз telegram - ға

Оқи отырыңыз