Мектеп сөмкесі қанша келі болуы керек? Ата-аналарға маңызды кеңес

Жаңа оқу жылы қарсаңында ата-аналар мектеп формасы мен оқу құралдарын ғана емес, баланың күн сайын көтеріп жүретін сөмкесіне де мән бергені дұрыс. Денсаулық сақтау мамандары оқушы рюкзагының салмағы баланың дене салмағына сай болуы керегін ескертеді. Өйткені шамадан тыс ауыр сөмке баланың иығы мен арқасына артық салмақ түсіруі мүмкін.

Қалай есептеледі

Толық жиналған рюкзактың салмағы баланың дене салмағының 10 пайызынан аспағаны жөн. Мысалы, салмағы 30 келі оқушының сөмкесі 3 келіден ауыр болмағаны дұрыс.

Бұл есепке тек оқулықтар емес, сөмкенің өзінің салмағы, дәптерлер, оқу құралдары және бала күн сайын алып жүретін басқа да заттардың барлығы кіреді.

Сонымен қатар оқу құралдарының өзіне қатысты да ұсынылатын шектер бар:

• 1-3 сынып оқушыларына – 2 келіге дейін;
• 4-5 сыныптарға – 2,5 келіге дейін;
• 6-7 сыныптарға – 3,5 келіге дейін;
• жоғары сынып оқушыларына – 4,5 келіге дейін.

Сондықтан ата-ана баланың рюкзагын анда-санда өлшеп, қажетсіз заттардың бар-жоғын тексеріп отырғаны жөн.

Ыңғайлы болғаны маңызды

Мектеп сөмкесін таңдағанда баланы бірге ертіп барған дұрыс. Рюкзакты бірден баланың арқасына тағып көріп, оның өлшемі оқушының бойына сәйкес келе ме, иыққа қалай орналасады – осының бәрін тексерген жөн.

Мамандар жеңіл, баланың дене бітіміне сай келетін және арқада ыңғайлы орналасатын рюкзак таңдауды ұсынады. Сөмкенің арқасына артық күш түспеуі үшін оның арқалығы тығыз болғаны дұрыс.

Иық баулары да маңызды. Олар кең әрі жұмсақ, сонымен бірге ұзындығын баланың бойына қарай реттеуге болатын болуы керек.

Бос рюкзактың өзі 1 келіден ауыр болмағаны жөн. Материалы берік әрі су өткізбейтін болса, бұл әсіресе жаңбырлы және қарлы күндері оқу құралдарын қорғауға көмектеседі.

Рюкзак таңдағанда қауіпсіздікке де назар аударған жөн. Әсіресе қыс мезгілінде балалардың сабақтан кейін үйге қайтатын уақыты қараңғы болуы мүмкін.

Сондықтан сөмкеде жарық шағылыстыратын элементтердің болғаны пайдалы. Олар көлік жүргізушілеріне жол бойындағы баланы алыстан байқауға мүмкіндік береді.

Сөмкеде не барын да бақылаңыз

Кейде рюкзактың ауыр болуына оқу құралдарынан гөрі баланың өзімен бірге алып жүретін артық заттары себеп болады. Бірнеше күн бұрынғы дәптерлер, қажетсіз кітаптар, ойыншықтар және сабаққа қатысы жоқ басқа заттар сөмкеде жиналып қалуы мүмкін.

Сондықтан ата-ана аптасына кемінде бір рет рюкзакты бірге қарап, қажет емес заттарды алып тастағаны дұрыс. Егер мектепте мүмкіндік болса, кейбір оқулықтарды сыныпта қалдыруға болады.

Дұрыс таңдалған және шамадан тыс ауыр емес рюкзак – баланың күнделікті жайлылығы ғана емес, оның денсаулығына түсетін артық жүктемені азайтудың қарапайым жолдарының бірі.

Бұған дейін жаңа оқу жылында Қазақстанда 380 мыңнан астам бала  алғаш рет мектеп табалдырығын аттайтынын жазғанбыз.