Маск студентті ЖИ бойынша команданың басшысы етіп тағайындады

Илон Маск негізін қалаған xAI компаниясы жас кадрларға сенім артып отыр. Бұл жолы 20 жастағы студент Диего Пасини деректерді аннотациялау командасының жетекшісі болып тағайындалды. Дәл осы топ жасанды интеллект Grok-тың оқытылуына жауап береді. Бұл туралы Business Insider сайтына сілтеме жасай отырып El.kz интернет порталы хабарлайды.

Пасини 2023 жылы мектепті тәмамдап, Пенсильвания университетіне оқуға түскен. Онда ол информатика мен экономиканы қатар оқығанымен, қазір академиялық демалыста жүр. Ол xAI-ға 2025 жылдың қаңтарында Сан-Францискода өткен корпоративтік хакатонда жеңіске жеткен соң келген.

Жаңа тағайындау компаниядағы қысқартулар кезеңімен тұспа-тұс келді: қызметкерлер саны 1 500-ден шамамен 900-ге дейін азайды. Соған қарамастан, Пасини қалған мамандармен кездесіп, олардың жұмысын бағалау мен алдағы міндеттерді нақтылау процесін бастап кетті.

Бұған дейін бұл топты Tesla-да он жылдан астам тәжірибесі бар топ-менеджер басқарған. Дегенмен, Маск соңғы уақытта жастарға көбірек сенім артып жүр: оның жаңа басшыларының ішінде 25 жасқа толмаған менеджерлер саны айтарлықтай артқан.

xAI-дағы қыркүйектің ортасындағы қысқартулар компания стратегиясының өзгеруімен байланысты. Енді «әмбебап оқытушылардың» орнына Маск тар бейінді, нақты бағытқа маманданған кадрларды жасақтауға ниетті.