Маңғыстаулық жиһанкез Бұқараға велосипедпен жетті

Маңғыстаулық саяхатшы Рәббім Борашев велосипедпен Бұқара қаласына табан тіреді, деп хабарлайды El.kz ақпарат агенттігі otpannews.kz-ке сілтеме жасап. 

Бұл туралы жиһанкез кезекті жазбасында мәлімдеп, тарихи шаһардың көрнекті жерлерін аралап шыққанын жеткізді. 

Сапарымның 7-ші күні 140 шақырым жүріп, кешегі тоқтаған жерден Газлиге 1,5 сағаттан жеттік. Бөкенбай екеуміз кезектесіп белсебетке отырып, жолды өндіріп алдық. Түсқайта Бұқара қаласы ішіне кірдік. Біз де Ақтаудан келдік. Бұқара музей қалада 140-тан астам архитектуралық ескерткіштер сақталып қамқорға алынған. Бұқара 1991 жылы әлемдік ЮНЕСКО тізіміне кіргізіліп, 1997 жылы сол ЮНЕСКО аясында 2500 жылдық мерейтойын тойлаған, - деп жазды саяхатшы. 

Естеріңізде болса, 6 сәуір күні маңғыстаулық жиһанкез Раббім Борашев «Ақтау – Түркі әлемінің мәдени астанасы» мәдени жылының аясында түркі мемлекеттерін велосипедпен аралауға шыққанын хабарлаған болатын. Ол сапар барысында ол Қоңырат-Хиуа-Үргеніш-Самарқанд-Ташкент-Түркістан-Тараз-Бішкек-Алматы-Ашхабад қалаларын басып өтіп, барлығы 4500 шақырымды бағындырмақ.
 
Р.Борашев бұған дейін Ақтау-Астана, Ақтау-Париж арасындағы бағытты велосипедпен жүріп өткен еді.