Конституция күні ауысты: тамыздағы демалыс қалай өзгереді

2026 жылдың тамыз айында бес күндік жұмыс аптасымен еңбек ететін қазақстандықтар 10 күн демалады. Биылғы тамыздың ерекшелігі – айдың соңында қосымша мерекелік демалыс болмайды. Себебі Конституция күні енді 15 наурызда аталып өтеді.

2026 жылдың тамызында қанша жұмыс және демалыс күні бар?

Тамыз айындағы еңбек және демалыс күндері: 

Бес күндік жұмыс аптасы үшін:

• 21 жұмыс күні;
• 10 демалыс күні.

Алты күндік жұмыс аптасы үшін:

• 26 жұмыс күні;
• 5 демалыс күні.

Тамыз айында қосымша мерекелік демалыс күндері қарастырылмаған.

Неліктен тамызда мерекелік демалыс болмайды?

Бұған дейін қазақстандықтар жыл сайын 30 тамыз – Конституция күніне байланысты қосымша демалыс алатын. Алайда 2026 жылғы 1 шілдеден бастап күшіне енген Конституцияның жаңа редакциясына сәйкес, бұл мереке 15 наурызға ауыстырылды.

Осы өзгеріске байланысты 30 тамыз мемлекеттік мерекелер тізімінен шығарылып, демалыс күні мәртебесінен айырылды. Сондықтан биыл тамыз айының соңында қосымша демалыс болмайды.

Тамызда қандай кәсіби және атаулы күндер бар?

Мемлекеттік мереке болмаса да, тамыз айында бірқатар кәсіби және тарихи күндер атап өтіледі:

• 2 тамыз (тамыздың бірінші жексенбісі) – Теміржол көлігі қызметкерлері күні;
• 10 тамыз – Абай күні;
• 9 тамыз (тамыздың екінші жексенбісі) – Құрылысшылар күні;
• 16 тамыз (тамыздың үшінші жексенбісі) – Спорт күні;
• 18 тамыз – Шекарашылар күні;
• 29 тамыз – Семей ядролық сынақ полигонының жабылған күні;
• 30 тамыз (тамыздың соңғы жексенбісі) – Шахтерлер күні.

Тамызда еңбек демалысын алу тиімді ме?

Тамыз – жазғы демалыс маусымының соңғы айы болғандықтан, көптеген қазақстандықтар осы кезеңде еңбек демалысын жоспарлайды. Биыл тамызда 21 жұмыс күні болғандықтан, еңбек демалысын алдын ала жоспарлап, жұмыс кестесін соған сәйкестендірген жөн.

Айта кетейік, бұрынғы жылдардағыдай тамыздың соңында қосымша мерекелік демалыс болмайтындықтан, сапар немесе демалыс жоспарын жасағанда осы өзгерісті ескерген дұрыс.