Колледж студенттеріне арналған әлем чемпионатында ел қоржынына медаль түсті

Қазақстандық колледж түлегі Дина Афанасьева WorldSkills Competition 2022 Special Edition әлем чемпионатында қола медаль жеңіп алды, деп хабарлайды El.kz Оқу-ағарту министрлігіне сілтеме жасап.

Отандасымыз «веб-технологиялар» құзыреті бойынша осындай жоғары нәтижеге қол жеткізді.

Бұл - дүниежүзіндегі колледж студенттеріне арналған ең беделді жарыста алған Қазақстанның алғашқы медалі.

Былтыр Павлодар колледжінің студенті болған Дина «веб-әзірлеу» бағыты бойынша EuroSkills Graz 2021 Еуропа чемпионатында қола медаль жеңіп алған болатын.

«Динаны жеңісімен құттықтаймын! Оның еңбегі, білімі мен табандылығы - еліміздің барлық колледж студенттеріне үлгі. Сондай-ақ әріптесім, елордалық колледж оқытушысы Айжан Зиядановаға студентінің тамаша нәтижесі үшін алғыс айтқым келеді. Алда Динаны жаңа жеңістер мен биік белестер күтіп тұрғанына сенімдімін» деді лебізін жолдаған Оқу-ағарту министрі Асхат Аймағамбетов.

WorldSkills Competition 2022 Special Edition-ға 60-тан астам ел 63 негізгі құзырет пен 1 ​​демонстрациялық құзырет бойынша қатысып жатыр.

Қазақстан Республикасының ұлттық құрамасы 30 құзырет бойынша сынға түседі.

Жарыс 10 елдің 16 қаласында өтіп, 28 қарашаға дейін жалғасады.