Көлікте түнеуге де болады: Škoda жаңа электрлі кроссоверін таныстырды

Škoda компаниясы өзінің жаңа электрлі флагманы Peaq кроссоверін таныстырды. Автокөлік ерекше аэродинамикасымен, алып панорамалық шатырмен, жаңа мультимедиа жүйесімен, демалысқа арналған арнайы режимдерімен және үйді электр қуатымен қамтамасыз ете алатын технологиясымен ерекшеленеді.

Спорткарлар қызығатындай аэродинамика

Жаңа Peaq Vision 7S концепті негізінде жасалған. Кроссовер Modern Solid фирмалық стилінде әзірленіп, минималистік дизайнымен және Т-тәрізді жарық шамдарымен ерекшеленеді.

Škoda тарихында алғаш рет бұл модельге жасырын есік тұтқалары орнатылған. Көлік қозғалып келе жатқанда немесе құлыптаулы тұрғанда тұтқалар кузовтың ішіне толық кіріп кетеді. Бұл ауа кедергісін азайтады.

Инженерлер аэродинамикалық кедергі коэффициентін 0,249 cW деңгейіне дейін төмендеткен. Бұл көрсеткіш көптеген спорткарлардан да жақсы. Мәселен, Porsche 911 (992) моделінде бұл коэффициент 0,30 cW.

Мұндай нәтижеге келесі шешімдердің арқасында қол жеткізілген:

• аккумуляторды қажет кезде ғана салқындататын белсенді ауа қақпағы;
• доңғалақтар маңындағы ауа ағынын бағыттайтын Air Curtain арналары;
• аэродинамикалық дөңгелек қақпақтары;
• тегіс түбі;
• оңтайландырылған шатыр сызығы;
• артқы спойлер мен қосымша қанатшалар;
• жаңартылған диффузор мен артқы шамдардың арнайы пішіні.

Škoda тарихындағы ең үлкен панорамалық шатыр

Peaq моделінің тағы бір ерекшелігі – ауданы 2,1 шаршы метрден асатын алып панорамалық шатыр.

Электрохромдық технологияның арқасында шатырдың мөлдірлігін электр тогы арқылы өзгертуге болады. Ол тоғыз бөлек аймақтан тұрады және әр бөліктің жарық өткізу деңгейі жеке реттеледі.

Салонда алғаш рет 13,6 дюймдік тік орналасқан мультимедиа дисплейі орнатылған. Android платформасында жұмыс істейтін жаңа жүйеде интерфейс толық жаңартылып, пайдаланушыға ыңғайлы етілген.

Сонымен қатар жүргізушілер жиі қолданатын функцияларды сақтап қоюға және жүйе ішінде компьютердегі Search қызметі сияқты іздеу жасауға мүмкіндік бар.

Стандартты сервистерден бөлек, көлік иелері бейнестриминг, онлайн ойындар немесе бейнеконференцияларға арналған қосымшаларды да орната алады.

Демалысқа арналған 6 режим

Peaq моделінде алғаш рет ұзақ сапарларға арналған Relax пакеті ұсынылды. Бұл жүйеде алты түрлі демалыс режимі қарастырылған. Олар автоматты түрде климат-бақылау жүйесін, интерьердің жарықтандырылуын және массаж функциясы бар орындықтарды реттейді.

Орындықтар жылыту, желдету және электр арқылы бірнеше бағытта реттеу функцияларымен жабдықталған.

Relax пакетіне сондай-ақ электрлі аяқ тірегі, екі бас жастықшасы, алдыңғы орындықтардың арасындағы жиналмалы үстел және қуаты 755 Вт болатын жаңа Sonos аудиожүйесі кіреді.

Camp Mode – көлікте түнеуге арналған режим

Жаңа мүмкіндіктердің бірі – Camp Mode. Бұл функция автокөлікте түнеуді жоспарлаған жүргізушілерге арналған. Режим іске қосылған кезде салондағы температура тұрақты сақталып, таза ауа үздіксіз беріледі.

Camp Mode жұмыс істеуі үшін батарея қуаты кемінде 20% болуы, 12 вольттық аккумулятордың жарамды болуы және интернет байланысының болуы қажет.

Үйді электр қуатымен қамтамасыз ете алады

Peaq екі бағытты қуат беру технологиясын қолдайды. Vehicle-to-Load (V2L) жүйесі арқылы көлік аккумуляторынан сыртқы электр құрылғыларын қуаттандыруға болады. Бұл әсіресе табиғат аясындағы демалыста немесе кемпингте пайдалы.

Ал фирмалық Ambibox DC Wallbox станциясына қосылған кезде Vehicle-to-Home (V2H) технологиясы іске қосылады.

Бұл жағдайда көлік аккумуляторында жиналған энергияны тұрғын үйге немесе басқа ғимаратқа беріп, резервтік электр көзі ретінде жұмыс істей алады.

Жаңа Peaq Volkswagen концернінің MEB+ платформасында құрастырылған. Сатып алушыларға үш модификация ұсынылады:

Peaq 60

• Артқы жетек;
• Қуаты – 204 а.к.
• 0-100 км/сағ – 8,4 секунд;
• Ең жоғары жылдамдық – 160 км/сағ;
• Жүріс қоры – 450 км.

Peaq 90

• Артқы жетек;
• Қуаты – 286 а.к.
• 0-100 км/сағ – 7,1 секунд;
• Ең жоғары жылдамдық – 180 км/сағ;
• Жүріс қоры – 640 км.

Peaq 90x

• Толық жетек;
• Қос электрқозғалтқыштың жалпы қуаты – 299 а.к.
• 0-100 км/сағ – 6,7 секунд;
• Ең жоғары жылдамдық – 180 км/сағ;
• Жүріс қоры – 610 км.

Барлық нұсқалар тіркеме сүйреуге арналған ілмекпен жабдықталған. Peaq 60 және Peaq 90 салмағы 1,8 тоннаға дейінгі тіркемені сүйрей алады, ал толық жетекті Peaq 90x үшін бұл көрсеткіш 2 тоннаға дейін жетеді.

Еуропада жаңа Škoda Peaq кроссоверінің бастапқы бағасы 49 900 еуродан (27 млн теңге) басталады.