Көктемде 10 өңірді су басу қаупі бар

Бұл туралы Төтенше жағдайлар министрі Шыңғыс Әрінов Үкімет отырысында айтты, деп хабарлайды El.kz ақпарат агенттігі.

Министрдің сөзінше, тау суларының ағыны салдарынан Алматы, Түркістан, ШҚО, Жетісу облыстары; қардың көп еруіне байланысты БҚО, Ақмола, СҚО, Қарағанды, Павлодар және Қостанай өңірлерін су басу қаупі бар.

Министрлік жергілікті атқарушы органдармен бірлесіп су тасқыны кезеңіне дайындық бойынша қажетті іс-шаралар кешенін өткізді. «Көктем» республикалық командалық-штабтық оқу-жаттығу шеңберінде басқару органдарының күштері мен құралдарының нақты дайындығы тексерілді. Халықты құлақтандыру пысықталды, зардап шеккен азаматтарды жинау пункттері дайындалды. Елді мекендерде уақытша бөгендер салу және үйемелеу (114 км), арықтарды, каналдарды (1 904 км), сондай-ақ авто және темір жолдардағы су өткізу құрылыстарын тазарту (5 002 дана) нақты түрде жүзеге асырылды. Елді мекендерден 10,5 миллион текше метрден астам қар шығарылды.

Дегенмен ТЖМ министрі бұл шаралар қауіпсіздік үшін жеткіліксіз екенін атап өтті.