Италияда мигранттар мінген қайық апатқа ұшырады

Италияның оңтүстігінде теңіз жағасында мигранттар мінген қайық апатқа ұшырады, деп хабарлайды El.kz ВВС-ге сілтеме жасап.

Апат салдарынан кем дегенде 58 адам, соның ішінде жаңа туған нәресте қаза болғаны айтылуда.

Қайық Калабрия жағалауындағы теңіз курорты – Стеккато-Ди-Кутро маңында суға кеткен. Италия билігі теңіз бен оның жағасында ауқымды іздестіру-құтқару операциясына кірісті.

Қазіргі таңда 80 адам құтқарылды. Олар қайық батқан соң жағалауға дейін жүзіп жеткен, - делінген теңіз күзеті таратқан хабарламада.

Бортында жүздеген адам мінген қайық жағалауға жетіп, жолаушыларын түсіргелі жатқан кезде батып кеткен.

Өрт сөндірушілер мен апат қызметі гидроциклдердің көмегімен тірі қалған жандарды іздестіріп жатыр. Бірақ ауа райының нашарлауы іздеу жұмыстарына кедергі келтіруде.

Adnkronos ақпарат агенттігі борттағы жолаушылар Иран, Ауғанстан, Сомали мен Пәкістан елдерінің азаматтары болғанын мәлім етті.