Испанияда екі пойыз соқтығысып, кемінде 46 адам қаза тапты

Испанияда ірі теміржол апаты болып, кемінде 46 адам қаза тапты, тағы 150-ден астамы жарақат алды.

Алдын ала мәлімет бойынша, жоғары жылдамдықпен жүретін пойыздардың бірі теміржолда тұрған екінші пойызға соғылған. Оқиға Толедо провинциясындағы Урда станциясының маңында болған.

Оқиға орнында жұмыс істеп жатқан Азаматтық гвардия қызметкерлерінің мәліметінше, бірнеше вагон рельстен шығып, теміржол үйіндісінен төмен құлаған. Кемінде төрт вагон аударылып кеткен.

Antena 3 телеарнасының мәліметінше, апат 28 қазан күні жергілікті уақыт бойынша таңғы сағат 08:30 шамасында Мадрид – Севилья теміржол желісінің 118-шақырымында болған. Оқиға Мора, Оргас және Урда қалаларының арасындағы учаскеде тіркелген. Қазір билік осы бағыттағы пойыз қозғалысын тоқтатты.

Құтқару қызметтері жұмылдырылды

Испания премьер-министрі Педро Санчес X әлеуметтік желісіндегі парақшасында қайғылы оқиғаға байланысты көңіл айтып, қаза тапқандардың отбасыларына қолдау білдірді. Оның айтуынша, апат орнында төтенше жағдайлар қызметтері жұмыс істеп жатыр. Зардап шеккендерге медициналық көмек көрсетіліп, олардың қауіпсіздігін қамтамасыз ету үшін тиісті мекемелер үйлесімді әрекет етуде.

Урда қаласының мэрі Мануэль Галан зардап шеккендерге көмек көрсету үшін арнайы медициналық пункт ұйымдастыруды тапсырған. Сондай-ақ Педро Санчестің қалаға өзі келуі мүмкін екенін айтқан.

Апат орнына бірнеше медициналық тікұшақ, жедел жәрдем және қарқынды терапия көліктері жіберілген. Жергілікті ауруханалар зардап шеккендерді қабылдауға дайындалған.

Испанияның денсаулық сақтау министрі Моника Гарсия болған жағдайды «өте ауыр апат»  деп сипаттаған. Алайда ол қаза тапқандар мен жараланғандардың нақты санын жариялаған жоқ. Cadena SER радиостанциясының хабарлауынша, билік әзірге тексерілген әрі нақты деректерді күтіп отыр.

Telecinco телеарнасы қаза тапқандар саны 50-ге жетуі мүмкін екенін хабарлады. Дегенмен бұл – оқиға орнындағы алдын ала бағалауға негізделген болжам. Ресми түрде расталған мәлімет емес.

Апатқа не себеп болуы мүмкін?

La Vanguardia басылымының жазуынша, апатқа мемлекеттік Renfe компаниясына тиесілі пойыздың қызыл сигналға қарамастан қозғалысын жалғастыруы себеп болуы мүмкін. Салдарынан ол жеке Iryo компаниясының пойызына артынан соғылған болуы мүмкін.

Алдын ала мәлімет бойынша, Renfe пойызында 397 жолаушы, ал Iryo пойызында 147 адам, оның ішінде бір сәби болған.

ABC басылымы көлік саласындағы дереккөздерге сілтеме жасап, апатқа мемлекеттік компания қызметкерінің ықтимал қателігі себеп болуы мүмкін екенін жазды. Басылым мәліметінше, ол негізгі сигнал беру жүйесіндегі ақауды жою жұмыстарымен айналысқан. Болжам бойынша, қызметкер Renfe пойызының машинисіне алда басқа пойыз бар екенін ескертпеген болуы мүмкін. Алайда апаттың нақты себебі әзірге ресми түрде анықталған жоқ.

Оқиға куәгерлерінің бірі апаттың салдары өте ауыр болғанын айтқан. Оның сөзінше, вагондардың ішінен қаза тапқандар мен жараланғандарды шығару жұмыстары жүріп жатыр. Кейбір адамдардың денесі үйінді астында қалып, оларды алып шығу қиынға соққан. Құтқару жұмыстарына қосымша адам күші қажет болған.

Мадрид билігі тұрғындарды зардап шеккендерге көмек көрсету үшін қан тапсыруға шақырды. Барлық қан тобы қажет екені хабарланды.

Испаниядағы ең ірі теміржол апаттарының бірі болуы мүмкін

El País басылымының жазуынша, бұл апат құрбандарының саны жағынан Испаниядағы соңғы жылдардағы ең ауыр теміржол апаттарының біріне айналуы мүмкін.

Биыл қаңтарда Кордова провинциясында болған теміржол апатынан 46 адам қаза тапқан еді. Ал 2013 жылы Галисия аймағындағы Сантьяго-де-Компостела қаласының маңында пойыздың рельстен шығып кетуі салдарынан 80 адам қаза тауып, 145 адам жараланған. Бұл оқиға 2013 жылдан бергі Испаниядағы ең қайғылы теміржол апаттарының бірі саналады.