Интернет-алаяқтық: шетелдіктен SIM-box құрылғысы тәркіленді

Көкшетау қаласында киберқылмысқа қарсы іс-қимыл басқармасының қызметкерлері алаяқтық мақсатта қолданылған арнайы құрылғыны анықтады. ІІМ мәліметінше, тексеру барысында 21 жастағы шетел азаматының интернет-алаяқтық әрекеттеріне пайдаланған SIM-box құрылғысы тәркіленді, деп хабарлайды El.kz ақпарат агенттігі.

Аталған құрылғы Қазақстан аумағында виртуалды абоненттік нөмірлерді заңсыз тіркеу және оларды интернет-алаяқтық жасау мақсатында пайдалану үшін қолданылған. Тергеу барысында құқық қорғау органдары күдіктіден трафикті басқаруға арналған құралдарды, ноутбукты, бірнеше ұялы телефон мен Wi-Fi роутерін тапты. Алдын ала мәліметтерге сәйкес, бұл құрылғылар азаматтарды алдау үшін қолданылған, - делінген мәліметте.

Аталған факті бойынша Қазақстан Республикасы Қылмыстық кодексінің 213-бабы 2-бөлігі – ұялы байланыстың абоненттік құрылғыларының идентификациялық кодын заңсыз өзгерту бойынша сотқа дейінгі тергеу амалдары жүргізілуде. Күдікті уақытша ұстау изоляторына қамалды.

Киберқылмыспен күрес қызметі азаматтарды цифрлық қауіпсіздікті сақтауға және белгісіз нөмірлер мен күмәнді сілтемелерге сақ болуға шақырады.