Instagram 90 минуттық көлденең видеоларды сынақтан өткізіп жатыр

Instagram әлеуметтік желісі ұзақтығы 90 минутқа дейін жететін көлденең форматтағы видеоларды сынақтан өткізе бастады. Жаңа мүмкіндік арқылы қолданушылар қысқа Reels видеосынан толық шығарылымға бірден өте алады. Әзірге функция АҚШ-тағы таңдаулы контент авторларына қолжетімді.

Қысқа Reels-тен толық видеоға өтуге болады

Instagram ұзақ форматтағы контентке арналған Features деп аталатын жаңа мүмкіндікті сынап жатыр. Оның басты ерекшелігі – қысқа видеоларды толық шығарылымдармен байланыстыру.

Мәселен, қолданушы Reels бөлімінен подкасттың қызықты үзіндісін көрсе, сол жерден бірден толық нұсқасына өте алады. Осылайша басқа платформаға ауыспай-ақ, сұхбатты немесе бағдарламаны соңына дейін Instagram ішінде көруге мүмкіндік туады.

Instagram компаниясының өнім жөніндегі вице-президенті Тесса Лайонс жаңа функцияның көрермен үшін ыңғайлы болатынын айтты.

Енді өзіңізге ұнаған подкасттың үзіндісін көрсеңіз, оны басып, әрі қарай тамашалай аласыз немесе толық видеоны аша аласыз, – деді ол.

Жаңа формат әсіресе подкаст жүргізушілеріне, сұхбат түсіретін журналистерге, білім беру бағытындағы блогерлерге және көлемді видеолар әзірлейтін авторларға тиімді болуы мүмкін.

Бұған дейін Instagram негізінен қысқа әрі тік форматтағы видеоларға басымдық беріп келсе, енді көлденең түсірілген ұзақ шығарылымдарды да дамытуға назар аударып отыр.

Жаңа функцияны кімдер пайдалана алады?

Instagram бұған дейін аталған мүмкіндікті Бразилиядағы бірқатар контент авторымен сынақтан өткізген. Енді компания тестілеу ауқымын кеңейтіп, АҚШ-тағы ондаған мың авторды бағдарламаға қосуды жоспарлап отыр.

Алғашқы қатысушылардың қатарында танымал подкаст жүргізушісі, Skims брендінің негізін қалаушылардың бірі Эмма Греде, сән және сұлулық тақырыбында контент әзірлейтін Монет Макмайкл бар.

Сондай-ақ Нью-Йорк тұрғындарынан қарым-қатынас туралы сұхбат алатын Престон Раковски мен футбол тақырыбындағы видеоларымен танылған Дональд Де Ла Хэй де жаңа мүмкіндікті сынап көреді.

Ұзақ форматтағы видеолар Instagram-ның Explore («Қызықты») бөлімінде және платформаның басқа да ұсыныстар таспасында көрсетіледі. Бұл авторларға жаңа аудитория жинауға, ал көрермендерге өздерін қызықтыратын толыққанды бағдарламаларды табуға мүмкіндік береді. Дегенмен функция әзірге тестілеу кезеңінде болғандықтан, оның барлық қолданушыға қашан қолжетімді болатыны белгісіз.

Instagram YouTube-пен бәсекелестікті күшейтпек

Instagram-ның ұзақ форматтағы видеоларға бет бұруы әлеуметтік желілер арасындағы бәсекелестіктің күшеюімен байланысты.

Қазір YouTube подкасттар, сұхбаттар, деректі видеолар мен танымдық бағдарламалар жарияланатын негізгі платформалардың бірі саналады. Ал Instagram көбіне қысқа видеолар, фотосуреттер және Stories арқылы аудитория жинап келеді.

Жаңа функция осы айырмашылықты азайтып, қолданушылардың Instagram ішінде көбірек уақыт өткізуіне ықпал етуі мүмкін.

Сонымен қатар ұзақ видеолар авторларға бір тақырыпты жан-жақты ашуға, көрерменмен тұрақты байланыс орнатуға және қысқа үзінділер арқылы толық шығарылымға қызығушылық тудыруға жол ашады.

Ұзақ форматтағы контентке қызығушылық тек әлеуметтік желілерде ғана байқалып отырған жоқ. Netflix пен Disney сияқты ірі стримингтік платформалар да подкасттар мен авторлық видеоларға назар аударып, аудитория үшін бәсекені күшейтіп жатыр.

Егер Instagram жаңа мүмкіндікті барлық қолданушыға енгізсе, платформа қысқа видеолар көретін әлеуметтік желі ғана емес, толыққанды подкасттар, сұхбаттар мен бағдарламалар тамашалайтын алаңға да айналуы мүмкін.