Индонезияда жалқау шенеуніктердің тізімі әлеуметтік желіде жарияланады

Индонезияның Батыс Ява провинциясының губернаторы Деди Мульяди мемлекеттік қызметкерлерді ынталандырудың әдеттен тыс жолын таңдады, деп хабарлайды El.kz интернет порталы.

НТВ арнасы таратқан ақпаратқа сәйкес, енді губернатор әлеуметтік желілерде ең жалқау қызметкерлердің аты-жөні мен мекенжайын жариялап отыратын болады.

Мульядидің айтуынша, халық өзіне қызмет етудің орнына жалақыны тек «отырып» алатын шенеуніктерді білуі тиіс. Ол мемлекеттік қызметтің басты міндеті қоғамға қызмет ету екенін ерекше атап өтті. Бұл бастама алдымен денсаулық сақтау, экология және білім беру салаларында сынақ ретінде енгізіледі.

Сонымен қатар губернатор «ұят тізімімен» бірге ең тиімді әрі еңбекқор қызметкерлердің тізімін де жариялауды жоспарлап отыр.

Алайда бұл идея қоғамда екіұшты пікір туғызды. Кейбіреулер адамдарды көпшілік алдында масқаралаудың қажеті жоқ екенін айтып, оның орнына ротация, ауыстыру немесе аттестация сияқты әдістерді қолдану жеткілікті деп есептейді.