Илон Масктің компаниясы бұрынғыдан да жылдам әрі арзан ЖИ-модельді жасап шығарды

Илон Маск негізін қалаған xAI компаниясы өзінің флагмандық жасанды интеллект моделінің жаңа нұсқасын таныстырды. Жаңа өнім Grok 4 Fast деп аталады және ол Grok 4-ке қарағанда жылдамырақ әрі үнемдірек балама ретінде ұсынылып отыр. Бұл туралы Engadget басылымына сілтеме жасай отырып El.kz интернет порталы хабарлайды.

Мәліметке сәйкес, Grok 4 Fast бұрынғыдай дәлдікті сақтай отырып, есептеулер үшін 40%-ға аз токен қолданады. Бұл сұраныстарды орындау құнын шамамен 98%-ға дейін төмендетіп, модельді түрлі міндеттер үшін әлдеқайда қолжетімді етеді.

Grok 4 Fast инновациялық архитектураға негізделген. Ол терең талдау (reasoning) мен жедел жауап беру (non-reasoning) режимдерін үйлестіріп, OpenAI (GPT-5) және Anthropic (Claude Opus) ұстанымдарына ұқсас тәсілді қолданады. Соның арқасында жүйе күрделі ой қорыту мен жылдам жауап арасында автоматты түрде ауысып отырады. Нәтижесінде Grok 4 Fast LMArena рейтингінде іздеу тапсырмалары бойынша бірінші орынға, ал мәтіндік жауаптардың сапасы бойынша сегізінші орынға ие болып, бенчмарк сынақтарында алдыңғы нұсқасын басып озды.

Жаңа үлгінің басты техникалық артықшылықтарының бірі – 2 миллион токенге дейінгі контекстік терезені қолдау. Бұл үлкен деректерді өңдеуде және талдауда кең мүмкіндік береді. Модель reinforcement learning әдістерімен үйретілген және код орындау, веб-іздеу сияқты сыртқы құралдармен жылдам жұмыс істеуге оңтайландырылған.

Grok 4 Fast қазіргі таңда пайдаланушыларға OpenRouter және Vercel AI Gateway платформалары арқылы, сондай-ақ xAI-дың API қызметі арқылы веб-қосымшаларда, iOS және Android жүйелерінде қолжетімді. Бағасы 1 млн токен үшін 0,20 доллардан басталады.