Хаби Алонсо матч кезінде Дастан Сәтбаевқа жеке нұсқау берді

Қазақстан құрамасының шабуылшысы Дастан Сәтбаев Лондонның «Челси» клубы сапында «Тоттенхэмге» қарсы жолдастық кездесуде бас бапкер Хаби Алонсоның тікелей тактикалық нұсқауын алды, деп хабарлайды el.kz интернет порталы. 

Матч барысында испаниялық маман жас қазақстандық футболшымен бірнеше рет байланысқа шыққан. Кездесудің 90-минутында Хаби Алонсо белсенді түрде ишара жасап, «Дастан!» деп дауыстап, шабуылшыға алаңда қалай әрекет ету керектігін көрсетті.

Сондай-ақ ойынның екінші таймында үзіліс кезінде Алонсо 17 жастағы Сәтбаевты алаң жиегіне шақырып, бірнеше секунд бойы тактикалық тапсырмаларды түсіндірген. Қазақстандық шабуылшы бапкердің нұсқауын мұқият тыңдап, бірден алаңға қайта оралып, берілген тапсырманы орындауға кірісті.

Еске салайық, Австралияда өткен жолдастық кездесуде «Тоттенхэм» «Челсиді» 2:1 есебімен жеңді. Лондондық клубтың жалғыз голын бразилиялық шабуылшы Эстевао соқты. Дастан Сәтбаев кездесуді қосалқы құрамнан бастап, 70-минутта дәл осы Эстеваоның орнына ойынға шықты.

Дастан Сәтбаев EA FC 27 ойынына енгізілді

Қазақстандық жас таланттың тағы бір жетістігі – Дастан Сәтбаевтың ресми түрде EA FC 27 футбол симуляторына енгізілуі болды.

Ойын жасаушылары 17 жастағы шабуылшының бастапқы рейтингін 66 деп бағалап, әлеуетін 82 көрсеткішіне теңестірген.

Алайда бұл баға әлеуметтік желі қолданушылары арасында қызу талқыланып жатыр. Көпшілік Сәтбаевтың әлеуеті әлдеқайда жоғары болуы тиіс деп есептейді. Олар оның 16 жасында-ақ Бельгия құрамасына қарсы кездесуде тәжірибелі Премьер-лига қақпашысын қапы қалдырып, гол соққанын, Қазақстан Премьер-лигасында жарқын ойын көрсеткенін алға тартады.

Сондай-ақ жанкүйерлердің пікірінше, клуб аңызы Дидье Дрогбаның «Челсиге» Сәтбаевты жалға бермеуге кеңес беруі де оның талантының жоғары бағаланатынын көрсетеді. Осыған байланысты жанкүйерлер EA FC 27 ойынындағы 82 әлеует Дастанның мүмкіндігін толық ашпайды деп санайды.

Соған қарамастан, Сәтбаевтың әлемдегі ең танымал футбол симуляторларының біріне енуі – қазақстандық футбол үшін маңызды жетістік әрі оның халықаралық деңгейдегі беделінің артып келе жатқанының тағы бір дәлелі.