Грант конкурсына 100 мыңға жуық өтініш келіп түсті

Еліміз бойынша мемлекеттік грант конкурсына 100 мыңға жуық өтініш келіп түсті, деп хабарлайды El.kz ақпарат агенттігі.

20 шілдеге дейін білім беру гранттарын тағайындау конкурсына 100 мыңға жуық өтініш келіп түсті. Талапкерлердің басым бөлігі құжаттарын үш республикалық маңызы бар қаланың жоғары оқу орындарына тапсырып жатыр. Оның ішінде Алматыға 38 мың, Астана 20 мың және Шымкент 6 мың түлек өтініш берген.

Талапкерлердің таңдауы ішінде ең сұранысқа ие бағыттар қатарында «Педагогикалық ғылымдар» (25 мың), «Инженерлік, өңдеу және құрылыс салалары» (16 мың) және «Ақпараттық-коммуникациялық технологиялар» (13 мың) қалып отыр.

Білім беру бағдарламаларының тобына келетін болсақ, ең көп өтініш «Ақпараттық технологиялар» - 11 мың. Ары қарай «Дене шынықтыру мұғалімдерін даярлау» - 5 мың өтініш келіп түскен. Үшінші орында «Шет тілі мұғалімдерін даярлау», оны 4 мың талапкер таңдаған.

Талапкерлердің грант конкурсына өтініштерін қабылдау барлық өңір бойынша 24 шілдеге дейін жалғасады.