Гонконгта өрттен қаза тапқандардың отбасыларына 25,7 мың доллардан төленеді

Гонконг билігі өрттен қаза тапқандар мен жараланғандардың отбасыларына арнайы өтемақы тағайындады, деп хабарлайды El.kz интернет порталы.

South China Morning Post мәліметінше, қайтыс болған әр адамның туыстарына 200 мың гонконг доллары (шамамен 25,7 мың АҚШ доллары) және жерлеу рәсімін ұйымдастыруға мемлекеттік қолдау көрсетіледі.

Ал зардап шеккендердің әрқайсысы бұған дейін уәде етілген 10 мың гонконг долларынан бөлек, қосымша 50 мың гонконг доллары көлемінде (6,4 мың АҚШ доллары) жәрдемақы алады.

Бұдан өзге, әр отбасыға күнделікті мәселелерді шешуге көмектесетін әлеуметтік қызметкер бекітіліп, барлық зардап шеккендерге уақытша баспана тегін ұсынылады.

Өрт сәрсенбі күні Тай По ауданындағы Wang Fuk Court деп аталатын сегіз мұнаралы тұрғын үй кешенінде басталған. Құрылысшылар орнатқан бамбук қаңқалары жалынның жеті ғимаратқа тез таралуына себеп болған. Бір ғана үй зардапсыз қалған. Кешенде шамамен 2 мың пәтер бар, онда 4 мыңға жуық адам тұрады.

Осы оқиғаға байланысты Гонконгтың сыбайлас жемқорлыққа қарсы тәуелсіз комиссиясы тергеу жүргізіп, бұған дейін сегіз адамды ұстағанын хабарлаған.