Generative Nation: Қазақстанда AI болашағы мен цифрлық трансформация мәселесі көтерілді

Астанада халықаралық деңгейдегі Digital Bridge 2025 форумы ашылды. Биылғы жиынның басты ерекшелігі – алғаш рет AI Week апталығының өтуі, деп хабарлайды El.kz интернет порталы.

29 қыркүйек пен 4 қазан аралығында Қазақстанның барлық өңірінде жасанды интеллектке қатысты ауқымды іс-шаралар ұйымдастырылмақ.

Форумның пленарлық отырысына Қазақстан президенті Қасым-Жомарт Тоқаев пен Венгрия президенті Тамаш Шуйок қатысып жатыр. Мемлекет басшысы цифрлық дәуірдің жаңа сын-қатерлеріне тоқталып, Қазақстанның стратегиялық ұстанымын атап өтті:

Жасанды интеллект тек бейбіт мақсатта қолданылуы тиіс. Оның әскери салаларда немесе кибершабуылдарда пайдаланылуына жол берілмеуі қажет. Біздің мақсатымыз – үш жылдың ішінде Қазақстанды толыққанды цифрлық мемлекетке айналдыру. Ол үшін бірыңғай экожүйе құруымыз қажет, – деді Қасым-Жомарт Тоқаев.

Халықаралық сарапшылар мен технология алыптары жиналды

Digital Bridge 2025 форумына әлемдік IT-индустрия көшбасшылары келді. Олардың қатарында:

• Мансур Ибрагим Әл Мансури – G42 International бас директоры;
• Павел Дуров – Telegram мессенджерінің негізін қалаушы және CEO;
• Питер Норвиг – Google зерттеу директоры, Стэнфорд университетінің ғылыми қызметкері;
• Кай-Фу Ли – Sinovation Ventures және 01.AI компанияларының CEO;
• Илья Стребулаев – Стэнфорд университетінің профессоры;
• Лили Лю – Solana Foundation президенті.

Олар Қазақстанның цифрлық трансформациядағы рөлі мен жасанды интеллекттің болашағына қатысты өз ойларымен бөліседі.

Форум тақырыбы – Generative Nation

Биылғы форумның басты тақырыбы – Generative Nation. Ол жасанды интеллект пен жаңа технологиялардың Қазақстанды білімге негізделген қоғам құруға, инновациялық экономика қалыптастыруға және жаһандық цифрлық кеңістікке интеграциялануға қалай ықпал ететінін талқылауға арналған.