Ербол Мырзабосынов әлем чемпионатында Абиба Әбужақыноваға жүлде табыстады

Туризм және спорт министрі Ербол Мырзабосынов дзюдодан Будапеште өтіп жатқан әлем чемпионатының марапаттау рәсіміне қатысты, деп хабарлайды El.kz интернет порталы.

Министр әйелдер арасында 48 келі салмақта жүлдеге ие болған спортшыларды марапаттады.

Аталған салмақта белдескен отандасымыз Әбиба Әбужақынова финалға дейін жетіп, отандық дзюдо тарихында әлем чемпионатында күміс медаль жеңіп алған тұңғыш қазақ қызы атанып отыр. 

Отандасымыз әлем чемпионатының іріктеу белдесуінде Ресей, Бельгия, Жапония балуандарымен белдесіп, барлығында жеңіске жетті. Жартылай финалда испан спортшысынан басым түскенімен, шешуші сында Италия балуанына жол берді. Ол бұған дейін әлем чемпионатында екі мәрте қола жүлдегер атанған болатын.