Енді қандас мәртебесін алушылар ұлты қазақ екенін дәлелдеуі тиіс

Еңбек және халықты әлеуметтік қорғау министрлігі тиісті құжаттар болмаған жағдайда оңайлатылған тәртіппен қандас және ҚР азаматтығы мәртебесін алу үшін қазақ ұлтына жататындығын айқындау қағидаларын әзірледі, деп хабарлайды El.kz ақпарат агенттігі.

Жаңа ережеге сәйкес, азаматтардың ұлты қазақ екенін анықтау туралы өтініш "Migration.enbek.kz" порталы, "Құтты мекен" мобильді қосымшасы, халықты әлеуметтік қорғау және жұмыспен қамту мәселелері жөніндегі жергілікті атқарушы органы немесе ҚР шетелдердегі мекемесі арқылы беріледі. 

Қазақстан Республикасының азаматтығын алу үшін өтініш білдірген адамдардың ұлты қазақ екенін анықтау үшін жергілікті атқарушы органмен комиссия құрылады. Комиссия құрамына халықтың көші-қоны, білім беру, мәдениет, ішкі саясат, ұлттық қауіпсіздік және ішкі істер органдары, этникалық қазақтар мәселелерімен айналысатын үкіметтік емес ұйымдар және қоғамдық бірлестіктер саласына жетекшілік ететін мамандар, сондай-ақ қазақ тілі мен Қазақстан тарихы саласындағы мамандар кіреді.

Комиссия қазақ тілін, салт-дәстүрін, әдет-ғұрпын, мәдениетін, туыстық қарым-қатынасын және адамның өзін этникалық қазақ ретінде тануға мүмкіндік беретін басқа да факторларды білуіне бағытталған сұхбатты жеке немесе онлайн режимінде жүргізеді. Содан кейін алынған ақпаратты талдап, шешім қабылдайды.

Ұлты қазақ екенін анықтау үшін өтініш беруші жергілікті органға туу туралы куәлікті, ата-анасының туу туралы куәлігін, ата-бабасының Қазақстан аумағында тұратыны туралы мұрағаттық анықтамаларды, бар болған жағдайда неке қию туралы куәлікті ұсынады. Одан кейін Комиссия 3 жұмыс күні ішінде ашық дауыс беру арқылы өтініш берушілердің ұлтының қазақтығын анықтау немесе анықтаудан бас тарту туралы ұсыным қабылдайды және оған қатысқандардың кемінде үштен екісінің оң даусымен қабылданды деп есептеледі, - делінген бұйрық жобасында.