Енді дәрі-дәрмектерді жаңа ережемен тіркейді

Қазақстанда дәрілік заттар мен медициналық бұйымдарды «бір терезе» қағидаты бойынша 100 жұмыс күнінен аспайтын мерзімде тіркеуді көздейтін пилоттық жоба қолға алынды, деп хабарлайды El.kz ақпарат агенттігі.

Бұл бастама мемлекеттік қызметтерді қайта құру және денсаулық сақтау саласын цифрландыру аясында Цифрлық даму, инновациялар және аэроғарыш өнеркәсібі министрлігі мен Денсаулық сақтау министрлігінің өзара іс-қимылы негізінде жүзеге асырылып отыр.

Жаңа тәсіл өнімдердің нарыққа шығу мерзімін айтарлықтай қысқартуға және қайталанатын әкімшілік рәсімдерді жоюға мүмкіндік береді. Қазіргі таңда дәрі-дәрмектерге сараптама жүргізу процесі 210 күнге дейін, баға белгілеу – 60 жұмыс күніне дейін, кәсіби сараптама – 50 жұмыс күніне дейін созылады. Ал композиттік мемлекеттік қызметті қолдану арқылы бұл үдерістер біріктіріліп, параллель жүргізіледі және жалпы ұзақтығы 100 жұмыс күнінен аспайды.

Композиттік мемлекеттік қызмет ерікті әрі баламалы негізде енгізіледі. Ол қолданыстағы сараптама, тіркеу және баға белгілеу рәсімдерімен қатар қолданылады және дәрілік заттарды Қазақстанның ұлттық дәрілік формулярына енгізу үшін кәсіби сараптамадан өткізуді де қамтиды.

Сонымен қатар, бұл қызмет Дүниежүзілік денсаулық сақтау ұйымымен бірлескен тіркеу рәсімін жүргізуді де қарастырады. Аталған рәсім алдын ала біліктендіру мен АҚШ, Еуропалық Одақ, Ұлыбритания, Жапония сияқты қатаң реттеу жүйесі бар елдердің реттеуші органдарының тану тәртібі шеңберінде жүзеге асады және тіркеу мерзімі 15 жұмыс күнінен аспайды.

Аталған жеделдетілген тәртіп танылған реттеуші жүйелері бар елдерде өндірілген медициналық бұйымдарға да қолданылатын болады.

Сонымен қатар, композиттік қызмет аясында өндіруші бағасын тіркеу, көтерме және бөлшек саудада үстеме бағаларды автоматты түрде есептеу жүйесі де қарастырылған. Бұл механизм тегін медициналық көмектің кепілдік берілген көлемі (ТМККК) мен міндетті әлеуметтік медициналық сақтандыру (МӘМС) шеңберінде қолданылады.

Пилоттық жоба 2025 жылғы 1 шілдеге дейін жалғасады. Егер оның тиімділігі дәлелденсе, композиттік қызмет көрсетудің тұрақты моделіне көшу және қолданыстағы нормативтік талаптарды оңтайландыру жоспарланып отыр. Бұл – дәрілік заттардың нарыққа жедел шығуын қамтамасыз ететін маңызды әрі тиімді қадам болмақ.