Елордадан күндізгі ауысымда 700-ге жуық жүк көлігі қар тасыды

Елордадан күндізгі ауысымда сегіз мың текше метрден астам қар шығарылды. Коммуналдық қызметтер тәулік бойы жұмыс істеп жатыр, деп хабарлайды El.kz ақпарат агенттігі.

Астана әкімдігінің мәліметінше, 3 желтоқсандағы күндізгі ауысымда коммуналдық қызметтер Астанадан сегіз мың текше метрден астам қарды 695 рейспен шығарған. Ал 4 желтоқсанға қараған түні қар тазалау жұмысына 230-дан астам жол жұмысшы және 400-ден астам арнайы техника жұмыс істемек. 

Қыс мезгілінің басынан бастап қаладан 65 мыңға жуық рейс арқылы 829 мың текше метр қар шығарылды. Ең алдымен, ережеге сәйкес, жолдарда кептеліс болмас үшін қозғалысы өте қарқынды орындар тазартылады. Сондай-ақ, қарқындылығы орташа учаскелер – алаңдар, вокзал маңы аумақтары, тротуарлар, әлеуметтік нысандарға кірме жолдар және т.б. тазартылады.

Орталық көшелерді, жолаушылар көлігі маршруттары жүретін орындарды, аялдамалар мен тротуарларда тазалау да басымдыққа ие.
Қалада бірнеше жабдықталған қар полигоны бар. Олар самосвал техникасының нөмірлік белгілерін оқу жүйесімен жабдықталған, мұнда бейнебақылау камералары орнатылып, жарықтандыру қосылған. Елорда тұрғындары мен қонақтарынан жолдарда абай болуды, қауіпсіздік ережелерін сақтауды, дауылды ескерту болған жағдайда алыс сапарларға шықпауды сұраймыз. Төтенше жағдай туындаған кезде «112» нөміріне хабарласыңыз, - деп жазылған қала әкімдігінің ресми ақпаратында.