Елордада V Дүниежүзілік көшпенділер ойындары кезінде қоғамдық көліктер тоқтатылмайды

Тұрғындар этноауыл, Қазанат, Арғымақ нысандарына өз көліктерімен жіберілмейді, деп хабарлайды El.kz ақпарат агенттігі.

Әр күні сағат 8:00-ден 21:00-ге дейін «Астана Арена» стадионы, ЭКСПО және Республикалық Бас мешітте автобустар жанкүйерлерді жарыс өтетін спорттық нысандарға ақысыз тасымалдайды. Одан бөлек қалалық қоғамдық көліктер ақылы түрде аталған үш нысанға қатынайды, - деді Дүниежүзілік көшпенділер ойындарын дайындау және өткізу жөніндегі дирекция басшысының орынбасары А.Қондыбаев.

Көшпенділер ойындарына қатысушылар мен қонақтарды қабылдау үшін 20 қонақ үй мен 331 көлік құралы жұмылдырылған. Қатысушылар үшін қонақ үйлерден спорттық нысандарға арнайы шатл басстар ұйымдастырылады.

Көшпенділер ойындарына шамамен 560 спорттық ат пен 45 жуық құс қатысады. Оларды орналастыруға арналған барлық орындар қажетті ветеринариялық-санитарлық стандарттарға сәйкес келеді. Құстар Астаналық циркке, жылқылар «Арғымақ» ат спорты кешеніне және «Қазанат» ипподромына орналастырылады.