Елордада «Ұлттың ұлы ұстазы» атты кітап көрмесі ашылды

Ұлттық академиялық кітапханада ұлт ұстазы Ахмет Байтұрсынұлының туған күніне орай «Ұлттың ұлы ұстазы» атты кітап көрмесі ашылды, деп хабарлайды El.kz интернет порталы.

Мәдениет және ақпарат министрлігі көрменің мақсаты оқырмандарға ғалымның құнды мұраларын кеңінен дәріптеу, шығармаларын таныстыру және ұлттық құндылықтарды насихаттау екенін атап өтті. Онда Ахмет Байтұрсынұлы шығармаларының алты томдығы, «Әдебиет танытқыш», «Тіл тағылымы», «Ақ жол», «Маса», «Қырық мысал», «Жан сөзімді кім түсінер?», сондай-ақ «Ахмет Байтұрсынұлының тілтанымдық мұрасы», «Алаш мұрасы», «Арыстары Алаштың», «Алашорда» еңбектері және ғалымның өмірі мен шығармашылығына арналған басқа да зерттеу еңбектері қойылды.

Көрмеге жалпы 100-ден аса құнды басылым мен құжат ұсынылды.