Елордада қоғамдық көлік мәселесі қалай шешіледі

Астана әкімі Жеңіс Қасымбек Instagram парақшасында қоғамдық көлік мәселесі қалай реттеліп жатқаны туралы жазды, деп хабарлайды El.kz интернет порталы.

Біздің негізгі басымдықтарымыздың бірі – қоғамдық көлікті дамыту. Биыл қалалық автопарк 300 жаңа автобуспен толықтырылады. Оның ішінде 118 автобус қазірдің өзінде қалаға жеткізіліп, желіге шығаруға дайындық жұмысы жүріп жатыр. Қалған 182 автобус қалаға алдағы 3-4 айда жеткізіледі. Бұдан бөлек, жеке автопарктер де өз қаражаты есебінен көлік құрамын жаңарту жұмысын жүргізіп жатыр, - деді елорда әкімі. 

Оның сөзінше, жаңа автобустар желідегі көлік санын арттыруға мүмкіндік бермек. Соның нәтижесінде аялдамада күту уақыты қысқарады, жаңа бағыттар ашылып, ескі автобустар кезең-кезеңімен ауыстырылады.

Қалаға 2023-2024 жылдары 700 автобус жеткізілді. Сонымен қатар, өздеріңіз білетіндей, LRT жобасын іске асыру жұмысы жалғасып жатыр, қазірдің өзінде сынақтық іске қосу жұмысы басталып кетті. Сондай-ақ, жолдар мен жол айрықтарын салу және жөндеу жұмысы жүргізіліп жатыр. Соңғы жылдары елордада екі көпір пайдалануға берілді. Аталған жұмыстың барлығы алдағы уақытта да жалғасын табады», – деп жазды Жеңіс Қасымбек.