Елордада қазақ тілінде онлайн-контент жасаушылардың VI форумы өтеді

28 сәуірде Астанада  қазақ тілінде онлайн-контент жасаушылардың VI форумы өтеді, деп хабарлайды El.kz 

Жиында «Қазақ медиасының болашағы» талқыланады. Сонымен қатар, қазақ тілінде ұсынылатын контенттің ең өзекті мәселелерін сарапшылар мен журналистер, блогерлер мен бейнеконтент жасаушылар талқылайды.

Qazaq Forum жыл сайын жүйелі түрде қатысушыларға өзекті мәселелерді талқылауды және халықаралық тәжірибе негізінде қазақстандық медиа-нарықтың даму көкжиектерін айқындайтын біріктіруші алаңға айналуда.

 Qazaq Forum ашылуында Ақпарат және қоғамдық даму министрі Дархан Қыдырәлі мен АҚШ-тың Қазақстандағы елшісі Дэниел Розенблюм сөз сөйлейді.

Форум барысында спикерлер мен қатысушылар талқылайтын тақырыптар: «Неге қазақ тілді БАҚ-тарда табыс көзі төмен?», «Иммерсивті журналистика – қазақ тілді журналистика жаңа трендтерге дайын ба?», «Телеарнадан ютубқа дейін: өтпелі кезең, тенденция, ақиқат», «Заман талабы – аудио-видео подкасттары және деректі фильмдер». Өткізілетін мастер-кластар: «Өз подкастыңды қалай бастап, дамытуға болады?», «Журналистік зерттеу мен тергеу. Ауқымды ақпаратпен жұмыс істеп, үйрену».