Елордада қар тазалауға 2,7 мыңнан астам жол жұмысшысы шықты

Күн сайын коммуналдық қызметтер Астанадан жүздеген ауыр жүк көлігімен мыңдаған текше метр қар шығарады. Бұл жұмыс тәулік бойы ауысымдық режимде жүргізілуде, деп хабарлайды El.kz ақпарат агенттігі.

Астана әкімдігінің мәліметінше, 11 желтоқсандағы күндізгі ауысымда қар тазалау жұмыстарында 2,7 мыңнан астам жол жұмысшысы және мыңнан астам арнайы техника жұмыс жүргізеді.

10 желтоқсаннан 11-іне қараған түні елордадан 545 рейспен 7 мың текше метр қар жиналып, шығарылды. Қыс мезгілінің басынан бері қаладан 75 703 рейспен 961 мың текше метр қар шығарылды, - делінген мәліметте.

Ережеге сәйкес, ең алдымен, қалада кептеліс болмас үшін өте қарқынды қозғалыс учаскелері тазаланады. Сондай-ақ орташа қарқындылығы бар учаскелер-алаңдар, вокзал маңы аумақтары, тротуарлар, әлеуметтік нысандарға кірме жолдар және т. б. орындар қардан тазартылады.