Басты
Жаңалықтар
Елордада апатты жағдайдағы үйдің тұрғындары көшіріледі

Елордада апатты жағдайдағы үйдің тұрғындары көшіріледі

Фото: gov.kz
Биыл апатты жағдайдағы ескі үйлердің арасында қауіпті күйдегі 18 үйдің тұрғындары көшіріледі, деп хабарлайды EL.KZ.

Қала әкімі Алтай Көлгінов бірқатар апатты үйдің тұрғындарымен кездесті.

– Мұндай көппәтерлі және жеке үйлердің проблемалары негізінен электр сымдарымен, кәрізбен, сумен, шатырмен, іргетасымен байланысты. Тіпті пәтер ішінде пеш те орнатылған, дәретханасы сыртта орналасқан тұрғын үйлер де бар. Онда 300-ден астам отбасы тұрады, - деп жазды Алтай Көлгінов.

Кездесуде Сарыарқа ауданында тұратын тұрғындарды (Рауан тұйық көшесі 15, 16, 17)  көшіру мәселесі талқыланды.

– Олардың баспанасы апатты ескі үйлер тізіміне енгізілген: қазіргі уақытта оларға арнап жаңа тұрғын үй кешені салынып жатыр, оны жыл соңына дейін аяқтауды жоспарлап отырмыз. Тұрғын үй кешенінің құрылысы аяқтала салысымен Рауан тұйық көшесі 15, 16, 17 мекенжайында тұратын тұрғындарды көшіреміз, - деді ол.

Елорда Даму бағдарламасы бойынша тұрғындарды қауіпті үйлерден көшіру жұмысы жүріп жатыр. Соңғы 3 жылда апатты үйлерден 700-ге жуық отбасы көшірілді. Бағдарлама басталғаннан бері шамамен 4 мың 200 отбасы көшірілді.

– Сол сияқты қалада 200-ден астам апатты үй бар. Олар бойынша тиісті жұмыс жоспарлы түрде жүргізілетін болады. Сонымен қатар, Мемлекет басшысының тапсырмасы бойынша баспана жағдайын жақсарту үшін тұрғын үй кешенін жөндеу, лифтілерді ауыстыру, жеңілдікті әлеуметтік тұрғын үй құрылысы, ұзаққа созылған құрылыстарды аяқтау бойынша жұмыстар жүргізіліп жатыр, - деді елорда әкімі.


Қысқа да нұсқа. Жазылыңыз telegram - ға

Оқи отырыңыз

{