Елордада 1200-ден астам заңсыз жарнамалық маңдайша алынып тасталды

Астанада қаланың сырт келбетін «Жарнама туралы», «Сәулет, қала құрылысы және құрылыс қызметі туралы» және «Қазақстан Республикасындағы тілдер туралы» Қазақстан Республикасы Заңдарының талаптарына сай келтіру бойынша белсенді жұмыс жүріп жатыр. 2025 жылы Астананың түрлі аудандарындағы ғимараттардың қасбеттерінен 1200-ден астам жарнамалық маңдайшалар алынып тасталды, деп хабарлайды El.kz ақпарат агенттігі.

Қала әкімдігінің мәліметінше, елорданың бірыңғай архитектуралық-көркемдік келбетін «Астана-Жарнама» КММ бақылайды, ол қала аумағында орналасқан сыртқы жарнамаларға мониторинг жүргізеді.

«Астана-Жарнама» КММ қызметкерлері аудан әкімдіктерімен бірлесіп қаланың заңсыз немесе сыртқы келбетіне сай келмейтін жарнама бойынша түсіндіру және алып тастау жөнінде көшпелі іс-шараларды тұрақты түрде өткізеді. Осындай іс-шаралар барысында кәсіпкерлерге маңдайшаларды ауыстыру қажеттігін түсіндіретін ақпараттық буклеттер тапсырылады.

2025 жылдың басынан Байқоңыр ауданында 60-тан астам жарнамалық маңдайша мен элементтер, Сарайшық ауданында 41 маңдайша мен 30 жарнамалық құрылым алынып тасталды. Сарыарқа ауданында белгіленген талаптарға сәйкес келмейтін маңдайшалар мен жарнамалық элементтерді бөлшектеу жұмысы белсенді түрде жалғасып жатыр. Жыл басынан бері мұнда 400-ден астам маңдайша мен жарнамалық конструкция бөлшектелді. Есіл ауданында 107 белгі мен 129 жарнамалық элемент алынып тасталды. Нұра ауданында магистральдық көшелер бойында орналасқан он тұрғын үй кешенінің қасбеттеріндегі жарнамалық конструкцияларды бөлшектеу жалғасып жатыр: жыл басынан бері баннерлер, жапсырмалар мен штендерлерді қоса алғанда, 67 маңдайша мен 14 жарнамалық элемент бөлшектелді. Алматы ауданында да айтарлықтай жұмыс жүргізілді – 360-тан астам жарнамалық элемент (баннерлер, көрсеткіштер, витриналардағы өздігінен желімдеу және басқа да конструкциялар) бөлшектелді.

Барлық шара кәсіпкерлерді алдын ала хабардар ете отырып өткізіледі. Хабарлама алғаннан кейін екі апта ішінде олар талапқа сәйкес белгіні өздері алып тастап немесе ауыстыра алады.

Елорданың бірыңғай сәулеттік-көркемдік келбетінің талаптарына сәйкес келмейтін, өз бетінше орналастырылған сыртқы жарнама мен маңдайшалардың 1200-ден астам элементін алып тастау шарасы жүргізілді.