Елімізде ажырасу құны қымбаттауы мүмкін

Мәжіліс депутаттары Салық кодексіне бірқатар өзгеріс енгізуді ұсынып отыр. Солардың бірі – некені бұзу кезінде төленетін мемлекеттік баж салығын арттыру, деп хабарлайды El.kz ақпарат агенттігі.

Жаңа Салық кодексінің жобасына сәйкес, некені бұзу үшін төленетін баж салығы қазіргі 0,5 АЕК-тен (2025 жылы – 1 966 теңге) 5 АЕК-ке (19 660 теңге) дейін өсуі мүмкін.

Мәжіліс депутаты Берік Бейсенғалиев бұл бастаманың мақсаты азаматтарды ажырасу туралы шешімді эмоцияға берілмей, байыппен қабылдауға итермелеу екенін айтты.

Баж салығын арттыру сәттік сезіммен ажырасу туралы шешім қабылдайтындар үшін белгілі бір тежеу бола алады. Бұл әсіресе жастар арасындағы орынсыз ажырасулардың алдын алуға көмектесуі мүмкін, – деді депутат.

Сонымен қатар Бейсенғалиев бұл ұсыныс мемлекеттік бюджетті толтыруды емес, отбасылық құндылықтарға жауапкершілікпен қарауды көздейтінін ерекше атап өтті.