Елена Рыбакина Australian Open турнирін жеңіспен бастады

Елена Рыбакина Австралия ашық чемпионатының екінші айналымына шықты, деп хабарлайды El.kz ақпарат агенттігі.

Кезінде әлемдік рейтингіде көш бастаған, қазір рейтингіде 38-орында тұрған чехиялық 31 жастағы тәжірибелі Каролина Плишкова оңай шағылар жаңғақ емес-ті.

Бірінші партияда Каролина брейк жасап, 2:0 есебімен алға кеткенімен, Елена таразы басын теңестіре алды.

Тай-брейкте де чехиялық спортшы 6:3 есебімен алға шығып, төрт бірдей сетболын пайдалана алмады. Рыбакина қатарынан бес допты өзіне жазды — 7:6 (8:6).

Екінші сетте есеп 1:1 болған мезетте қазақстандық теннисші брейкпен алға кетті — 2:1. Осыдан соң қарқынын үдетіп, жеңіске жетті — 6:4.

Елена Рыбакина екінші айналымда әлемнің 57-ракеткасы ресейлік Анна Блинковамен шеберлік байқасады.