Ел азаматтарына «Ата-аналар мектебінде» оқу міндеттелмек

Оқу-ағарту министрлігі "Балаларды зорлық-зомбылықтан қорғау, суицидтің алдын алу және олардың құқықтары мен саламаттығын қамтамасыз ету жөніндегі 2023-2025 жылдарға арналған кешенді жоспарға" енгізілетін өзгертулерді қоғам талқысына ұсынды, деп хабарлайды El.kz ақпарат агенттігі.

Жоспарға сәйкес, ата-аналарға арналған курстарды қазақстандық отбасылар үшін міндетті ету мәселесі қарастырылады. Министрліктің ұсынысы бойынша, жастар некесін тіркеу алдында, жас отбасылар жүктілік кезеңінде және баланың дүниеге келуінің алдында, сондай-ақ, баланы балабақша мен мектепке берер алдында ата-аналарға арналған курстарға қатысуы керек. 

Бұл ата-аналардың жауапкершілігін арттыруға, бала тәрбиесін жақсартуға көмектеседі және әлеуметтік мәселелерді шешуде де маңызды. Баланы дүниеге әкелген кезде және балабақша мен мектепке қабылдау кезінде ата-аналарды оқыту балалардың білім беру ортасына бейімделуін және педагогтар мен медицина қызметкерлерімен өзара әрекеттесуін жақсартады, – делінген министрліктің түсіндірме жазбасында.

Сонымен қатар, ата-аналар мектебі әкелердің тәрбие процесіне араласуын арттыруға көмектеседі.