«Экспо-адамдар» көпшіліктің көңілінен шықты

Дүркіреп өткен елорда тойында «ЭКСПО-2017» көрмесіне қатысатын мемлекеттердің мүсіндері қойылды.

«Нұржол» желегінің жоғары жағында  орналасқан мүсіндер шыны пластиктен жасалған. Олар алаңға шахматтық тәртіпте қойылды. Мүсіндер экспозициясы «Astana Art Fest» заманауи өнер фестивалі аясында өтті.

Алаңдағы мүсіндерге жеке тоқталар болсақ, олар әр елдің өзіндік ерекше стиліне сай әзірленген. Бұл жерден алуан түрлі пейзаждар, мемлекеттік рәміздердің кей элементтері, экзотикалық жануарлар, сәулет ескерткіштері, ұлттық ою-өрнектер, мемлекеттердің географиялық карталарының бейнесін көруге болады.  

Көпшіліктің көңілінен шыққан туындыларды қазақстандық жас суретшілер салып шыққан. Оларға жұмыс барысында Астанадағы «Құланшы» заманауи өнер орталығының мамандары жетекшілік етіпті. Эскиздердің жасалуы мен идеяның жүзеге асуына бір айдан астам уақыт жұмсалыпты. Суретшілер өз қолынан шыққан өнер туындыларын «Экспо-адамдар» деп атаған.  «Экспо-адамдардың»  қолында үлкен шар бар. Шығармашылық тұрғыдан алғанда, бұл көрініс әлемнің аллегориясы іспетті. Яғни, «ғалам әр адамның алақанында» деген мағынаны білдіреді.

Әзірлеген – Айбота ӨТЕУЛІ

Сурет: Астана қалалық Мәдениет басқармасы